الاثنين، 19 سبتمبر، 2011

نصائح رمضانية ـ ج2


(الصورة منقولة وليست من تصميمي)
النصيحة السادسة عشرة : مهما تجاوز اليأس مداه جوه قلبك ووصلت لقمة الإحباط والدنيا قفلت في وشك بيبانها وشبابيكها .. وكل الناس سدت ودانها عن شكواك ، وملقتش صاحب ولا حبيب يطيب خاطرك ويطبطب عليك .. مع كل ده إوعي في يوم تتمنى الموت أو تطلبه أو تترجى ربنا يخلصك من دي الحياة .
النصيحة السابعة عشرة : يجوز - يمكن - أشك - أظن - إحتمال - أتوقع - تقريبا ..... مفيش في الدنيا حاجه أكيدة خليك واثق ومتأكد من كده .
النصيحة الثامنة عشرة : مفيش نصيحة مني .. أنت ناصح نفسك .. ها هتقول لنفسك إيه ؟
النصيحة التاسعة عشرة : كل يوم وله شمس جديدة كلها نشاط وقوة وحيوية .. متخليش أيامك كلها نوم ولعب ونوم .. متعديش يومك من غير فايدة تعملها وتفتكره بيها ويا سلام لو الناس شكروك عليها .. الكسل عمره ما كان عسل .
النصيحة العشرون : إفرح بنفسك ومتوطيش منها لأي سبب، عمرك ما هتلاقي حد يقدرك لو إنت مقدرتش نفسك وإحترمتها في الأول .
النصيحة الواحدة والعشرين : أجمل اللحظات لحظة أن تحررت من الدنيا لتعلو طائرا بحلم رغبت بتحقيقه .. وأحلى الساعات ساعة أن عشت حبا لم يرهقه لغو البشر ونظراتهم .
النصيحة الثانية والعشرين : خليك في حالك
النصيحة الثالثة والعشرين : صحابك هما أخواتك اللي مش من دمك لو طلبوا منك دمك متبخلش عليهم
النصيحة الرابعة والعشرين : الصبر والرضا حافظ عليهم معاك هتلاقي نفسك دايما مرتاح البال
النصيحة الخامسة والعشرين : خيركم خيركم لأهله
النصيحة السادسة والعشرين : الدين لله والوطن للوطنيين
النصيحة : السابعة والعشرين : تحرر بقدر ما يكفيك لا بقدر ما يؤذينا ويفنيك
النصيحة الثامنة والعشرون : فيه ناس كتير محتاجه وناس كتير مساكين ، دور على أقرب واحد ليك حتى ولو من عيلتك ، ده الأقرابون أولى بالمعروف ، دور وطلع من مالك ولو خمسة جنيه واديهمله .. هيتبسط قوي منك وهتفرح إنت فوي بعملك ده.. وربنا هيفرح بيكم
النصيحة التاسعة والعشرين : متستناش شكر على عمل الخير اللي بتعمله ، ويا سلام لو محدش عرف إن إنت اللي عملته يعني تعمل الخير وتستخبى جوه عيون البحر
النصيحة الثلاثون : متكتمش على مراوحك وتفضل مبوز ومكشر في وشوش اللي حواليك .. خليك فريش وبشوش ..عيش أيامك عيش لياليك .. خلي شبابك يفرح بيك
ملحوظة : ممكن تقرأ نصايح رمضان ـ ج1