الاثنين، 23 أبريل 2012

للبسطاء فقط .. "تعالوا نكتب دستورنا" + فيديو


للبسطاء فقط .. "تعالوا نكتب دستورنا"




    للبسطاء فقط .. "تعالوا نكتب دستورنا"

    " يعنى إيه دستور .. وبعدين هو اللى هنقوله ممكن حد يسمعه؟!، الدستور ده هيضمن لنا حقوقنا ازاى ، عايزين دستور يخلينا نعيش بأمان ويجيب شغل لعيالنا , عايزين الأول دستور ميخليش حد يتحكم فينا ، ويخلينا نحاسب نواب مجلس الشعب اللى بيضحكوا علينا، ويضمن ان محدش يبات جعان ولا شاب يفضل عاطل ".
    كانت هذه أبرز ردود أهل منطقة "الحيتية" ، واحدة من أبرز المناطق الشعبية فى منطقة العجوزة، عندما سألهم أعضاء مبادرة " تعالوا نكتب دستورنا " عن مطالبهم فى الدستور الجديد وعن أحلامهم بالنسبة لمصر بعد الثورة .
    أحلام دستورية 
    قالت قمر محمود: " أنا عايزة دستور يراعى المطلقات وأولادهم ، لأن الطلاق بيخسر الست كل حاجة ومش بيبقى فيه مكان اصرف منه على عيالى، والحكومة بتدينا إيه؟..ملاليم، يعني تكون فيه مادة تحمى الأبناء وأمهم من الأب الظالم وياخدوا حقهم منه من غير ما يتذلوا ".
    أما حنان السيد فكانت مقترحاتها: " البلطجة فى كل مكان ولازم الدستور الجديد يوفر لنا الأمان   ويخللي عقوبة البلطجة إعدام عشان يكون عبرة لغيره، زمان كنا بنتسرق وعايشين فى أمان وبعد الثورة لسه بنتسرق لكن مش عايشين فى أمان ".
    وانحصرت آمال حكمت السيد في شرطة منضبطة: " عايزة دستور فيه مواد تحمينا من الإهانة ومتخليش ضابط شرطة يهينى، عشان لما بروح أنا أو جوزي أو حد من عيالي نشتكى فى القسم الضابط بيهينا.. وفي مرة أخدوا أخويا ظلم، وكل ده علشان احنا فقرا ".
    وبدوره أراد رمضان عيد دستورا يرفع الظلم وينصف الفقراء ويعطيهم حقهم: " عايز دستور يوفر لكل أسرة أنبوبة البوتاجاز ورغيف العيش اللى مش بنلاقيه، ويوجد لي طريقة عشان أعرف اشتكى المسئول لما يقصر معايا فى أى خدمة أو أى طلب، وكمان يكون فى الدستور مادة تضمن للشباب شغل محترم علشان ميفضلوش عواطلية كده ".
    وأيدته في الرأي بدور محمد على التي طالبت بدستور يوفر للمواطن البسيط عيشة كريمة و يوفر لكل أسرة معاشا مناسبا ويقضي على العشوائيات، مؤكدة على ضرورة محاسبة كل كاذب يخدع المواطنين ولا ينظر في مطالبهم بعد وصوله للسلطة مثلما حدث فى انتخابات مجلس الشعب الأخيرة.
    وختم السيد محمد : " أنا بدفع فلوس الزبالة على فاتورة الكهرباء ومع ذلك الزبالة مش بتتلم..!  لماذا لا يكون فى الدستور مادة تعاقب اللى بيرمى زبالة فى الشارع ويكافئ اللى يزرع الشارع ويجمله ؟ عايزين مادة تضمن ان يكون فيه مدارس كويسة لعيالنا وفيها أماكن للعب بدل اللعب فى الشارع ".
    الحلم المشترك
    كانمت هذه ببساطة مطالب وأحلام وآراء سكان عشوائيات العجوزة فى الدستور الجديد ، والتي قد تتشابه مع مطالب المواطنين البسطاء في مختلف محافظات الجمهورية التي سيقوم شباب مبادرة "تعالوا نكتب دستورنا"  برفعها للجنة صياغة الدستور من خلال وثيقة العقد الجتماعي أو " وثيقة الحلم المشترك "  كما أطلقوا عليها.
    في تعليقه أوضح أحمد حشمت منسق المبادرة: " بما إن الدستور لا يخرج إلا بالتوافق فقد قررنا استطلاع آراء البسطاء ومعرفة مطالبهم فى الدستور وأيضا جمع كل مشاكل المواطنين، بحيث نقوم بإخراج 3 وثائق معبرة عن أحلام المواطنين.. الأولى هى وثيقة الحقوق الأساسية، والثانية وثيقة المبادئ الدستورية، والأخيرة مطالب الشعب من كل المحافظات.
    وأكد أن المبادرة يشارك فيها عدد من المتطوعين من كل المناطق الشعبية والعشوائية ،لا ينتمون إلى أى احزاب سياسية أو أى تيار، فى صورة لجنة منتخبة هدفها التواصل مع أهل المنطقة وبها ممثل لصياغة وثيقة عقد الحلم المشترك .




    اقرأ المقال الأصلي علي بوابة الوفد الاليكترونية الوفد - للبسطاء فقط .. "تعالوا نكتب دستورنا" 






    تقرير راديو سوا عن المبادرة