‫#‏عن_الشارع‬ _الشعبي

الشارع مليان تفاصيل لا يستهان بيها
كراكيب متركبه بعشوائية خلاقه
طبعا أنا بتكلم عن الشارع الشعبي اللي الناس بتهرب منه وتروح الرحاب أو الشيخ زايد أو العين السخنه
وطبعا بتكلم هنا عن الشارع الشعبي مش شوارع العشوائيات اللي معتقدش إننا ممكن نلاقي فيها شوارع أصلا
مواصفات الشارع الشعبي اللي اقصده كالأتي:
عرضه ميقلش عن 8 متر تقريبا
طوله من أوله لأخره حوالي 50 متر تقريبا
جواه مدرسة ابتدائي/إعدادي طالع منها موسيقى طابور الصباح ودوشة الإذاعة المدرسية وصوت عيل صغير بيحي العلم بعلو حسه وكله شموخ "تحيا جمهورية مصر العربية"
جنب المدرسة بالظبط محل مكوجي معلي صوت الراديو وطالع منه أغنية "مصر هي أمي"
في نفس اللحظة بيعدي عربية بيجرها حمار وراجل راكب عليها لابس جلابية فلاحي وماسك اللجام وبينادي بصوت حياني: "بيكيا بيكييييييا"

ودوشة صوت طاسه الزيت ع النار في محل فول وطعميه وناس بيتزاحموا عشان ياخدوا طعميه سخنه في سندوتشات العيش البلدي
وبنات ثانوي بلبسهم الأبيض في كحلي حاضنين شنط كتبهم ع صدرهم بيدفوا بيها إحساسهم إنهم متأخرين ولازم يمدوا شوية وإلا هيتذنبوا
قهوة في نص الشارع مشغله إذاعة القراءن الكريم ع النايل سات وصوت المنشد طالع بيصدح:" محمد بشر . . في نوره قمر.. في طهره ملك . . يمشي على قدمين"
ورشة السمكري اللي جنب القهوة وفيها صاحبها مطلع دماغه من تحت عربية دايو زرقا وبيقول للقهوجي:" واحد شاي على بوسطه سكر عالي وحياة ابووووك"
ميني ماركت حاطط على ناصيته كراتين الشيبسي والشيتوس وتلاجات البيبسي والكولا بلونها الأحمر والأزرق
صوت طشه الطعمية في طاسه الزيت بيعلى مع صوت راديو المكوجي اللي في نفس اللحظة بيغني: "يا أغلى اسم في الوجود. . يا اسم مخلوق للخلود . . مصر مصر تحيا مصر"
وعيلين بينطوا سور المدرسة وواحد فيهم بيقول للتاني: " يلا يا عم نلحق الماتش . . النهاردة هنلعب مع فرقة الواد زيزو دول مراهننا على 5 جنيه إنهم هيغلبونا"
وهوووووب يركبوا أول توكتك معدي وينطوا جواه زي الفيران . . على صوت تسجيل التوكتك اللي بيغني أغنية:" أنا شارب سوجاارة بني ودماغى عمالة بتاكلني"
وست من الدور السادس في نفس اللحظة بترمي كيس زبالة صغير اسود فيقع في نص الشارع في نفس المكان اللي كان واقف فيه التوكتك
بتاع الألوميتال فارش مطبخ لسه مخلصه لزبون وعارضه قدام محله ولون المطبخ بيج في بني
السجاجيد المزخرفة والمنقوشة ألوان كتيرة اللي اتغسلت طلعها المكوجي وعلقها على المواسير اللي بيعلق عليها الحاجات دي عشان تنشف في الشمس
صوت السيسي في تليفزيون القهوة بيقول: " نحن نحارب الإرهاب ليس من أجل مصر وحدها . . ولكن من أجل الإنسانية"

ريتويت + شير + أنشر #هام_جدا #أحداث_مجلس_الوزراء

ريتويت + شير + أنشر #هام_جدا #أحداث_مجلس_الوزراء
نداء .. وملحوظات مهمة واجب اتخاذها للمحكوم عليهم غيابيا في قضية #أحداث مجلس الوزراء
لو انت واحد من المتهمين الـ 269 اللي اتحكم عليهم النهاردة 4 فبراير 2015 بالمؤبد أو بـ 10 سنين غيابيا من #ناجي شحاته في قضية مجلس الوزراء والمجمع العلمي 11/2011 يبقى لازم تعمل الأتي:
1- غير المكان اللي متعود تكون موجود فيه (بيتك - شغلك) لحد ما تعمل إعادة إجراءات في الحكم الغيابي الصادر ضدك، لإن الداخلية هتبادر بسرعة جدافي تنفيذ الأحكام دي بطريقة مرعبة.
2- قلل حركة تنقلاتك وخلي إقامتك مستقرة في المكان الأمان اللي هتختاره عشان إنت دلوقتي هتبقى مطارد وهارب طبقا لقانون السلطة والأمن.
3- قلل تواصلك مع الأشخاص عن طريق التليفون أو النت ، وحاول تلغي إمكانية تتبع مكانك من الفيسبوك أو تويتر أو أي موقع تواصل أخر، وخلي كلامك طوال الأسبوعين الجايين مع أهل ثقتك بس.
4- بس ده ميخلكش تقلق أو تتوتر .. اتعامل طبيعي جدا بصرف النظر عن أي حاجه .. انت بالنسبالك الحكم غيابي يجوز الطعن فيه بطريق عادي اسمه إعادة الإجراءات وده بيلغي الحكم الصادر ضدك وبيعيد نظر القضية مرة تانية قدام المحكمة.
5- تواصل مع أقرب محامي سواء حقوقي أومهني وأعمله توكيل في أقرب وقت بشرط إنك تكون بتثق فيه عشان يزبط معاك ميعاد وإجراءات الطعن على الحكم ده بإعادة الإجراءات.

#‏معتقلي_الكورس‬

بمناسبة الفيديو ده اللي بتروج ليه ‫#‏الداخلية‬ ومديرية الأمن على إنه دليل إثبات ضد مجموعة الطلبة اللي كانوا في مركز تعليمي بيتعلموا فنون ومهارات القيادة والعمل الجماعي والتخطيط الاستراتيجي، وباين في الفيديو مستندات تخص تحليل لموقف الإخوان ومؤيديهم وموقف الدولة ومؤيديهم وكيفية التعامل مع الوضع ده من خلال‫#‏التنظيم‬ في مجموعات تهتم بالدعم سواء الإعلامي والقانوني والإلكتروني والتحركات المطلوبة لزيادة فرص نجاح ما يسمى من وجهة نظرهم (صف ‫#‏الثورة‬) وتقليل فرصتمكن ما يسمى من وجهة نظرهم (صف ‫#‏الإنقلاب‬).

فعايز أقول من الملاحظة السريعة لعرض المستندات في الفيديو إن الأليات اللي هما كتبينها كلها أليات ‫#‏سلمية‬ زي (الإعتصام والإضراب والمقاطعة .. إلخ)

بالإضافة إلى إنهم كانوا في ‫#‏إجتماع_خاص‬ لا يجوز للأمن دخوله أو التصنت عليه أو مراقبته أو التدخل في شئونه.

ولما يتقبض على ناس ويتشهر بيهم ويتحقق معاهم ويتحاكموا بتهم معروفة زي (الإنضمام لجماعة محظورة وتنظيم إرهابي، ويتلفقلهم تهم تانية ليها علاقة بالتخطيط لإنفجارات أو إحداث خلل بالسلم العام وتكدير الأمن العام) ويترزعوا في المستقبل لما ينزلوا قدام قاضي زي ‫#‏ناجي_شحاتة‬ أحكام بالمؤبد والإعدام بسبب إنهم بيتحركوا سلميا ولم يضبطوا في مواقع تثبت عليهم إرتكاب ‫#‏العنف‬ أو الإتفاق عليه أو تمويله.

فده يبقى نكسة كلنا هنعاني منها مستقبلا زي ما بنعاني دلوقتي من نكسة قانون التظاهر.

والتدخل الأمني الفاحش ضد كل التحركات السلمية المشروعة واللي هي حلال بالدستور ذات نفسه اللي بيقر ده ويلزم الدولة باحترامه.

يبقى مفيش قعلا قدام الناس دي غير العنف والإرهاب.

دولة أمنية بوليسية مستبدة تجيد فعلا صناعة الإرهاب

وبعد كده يقولك اديني تفويض عشان أحارب الإرهاب المحتمل؟

يا خوايا وجودك ووجود غربانك في حياتنا هو فعلا الإرهاب اللي لازم نتخلص منه

في الزحام

في الزحام .. يختلط الكلام

يقول الميت: قد أوجزت في حياتي 

وقفت كالجذع من النخل 

في صحراء ذاتي

ولم يمس طلعي، متاع جارتي العلياء

فقط نطقت بالهوى 

سكاتي

الصورة مقتبسة من هذا الرابط

يقول النائم في سلام:

حاربت نفسي .. وامتنعت،

عن قول اللئام

ولم أجدف أو أهرطق في منامي

لم أغير حجتي أو عهودي

لم أرفع الرأس الثقيل عن كتافي

وأدفنه كطائر النعام

في الزحام ..

فقدت من يدي اللجام

لا .. قالها شعب تشيلي باللغة الأسبانية

في سينما ‫#‏الجماعة_الوطنية‬ يوم السبت اللي فات 27 ديسمبر 2014 اتفرجنا في لمة شباب حلوة على فيلم تشيلي اسمه "لا .. NO" بيعرض تفاصيل الأيام اللي حصل فيها استفتاء على استمرار "بيونشيه" رئيس تشيلي في الفترة من 1973 حتى 1990.
الفيلم بيوضح إزاي قدر الشعب يغير الحكم العسكري بقيادة "بيونشيه" اللي وصل له بإنقلاب في سبتمبر 1973 على الرئيس المنتخب ‫#‏سلفادور_الليندي‬ - بعد ما عينه قائد للجيش في نفس السنة - زي ‫#‏السيسي‬ كده
الإنقلاب اللي عمله بيونشيه على الليندي كان مرعب لدرجة إنه قصف القصر الرئاسي بالقوة الجوية وكمان دخل بالمشاة والدبابات واحتل القصر، واتقتل الليندي وقتها لإنه مرضاش يتخلى عن حقه الشرعي في الحكم زي ‫#‏مرسي‬ كده
الحملة اللي عملها شعب تشيلي عشان اسقاط حكم بيونشيه استمر العمل فيها من بداية 1983 وحتى الاستفتاء اللي كان في 1990.
في الاستفتاء صوت لـ (لا) بنسبة 55% مقابل 42% لـ (تعم)، وبضغط من القوى الدولية رضخ بيونشيه إنه يسيب الحكم بعد 17 سنة من إنقلابه على الليندي.
لكنه فضل في منصب قائد للجيش - وزير دفاع يعني - بعد تركه للحكم، وبعدين بقى عضو في مجلس الشيوخ
المهم إن عصر ‫#‏بيونشيه‬ ده كان كله قمع وتعذيب لدرجة إن الإحصائيات بتقول إن في عهده حصل حوالي 28000 حالة تعذيب.
وأكتر من 5800 شيلي اتقدموا بطلب للجوء السياسي في سويسرا بس في فترة حكم أوغستو بينوشيه لبلادهم، وحصُـل حوالي 1500 منهم على اللجوء.
وكان شديد الكره للثقافة والمثقفين وضد الإشتراكية والإشتراكيين، لدرجة خلت كاتب عبقري زي ‫#‏ماركيز‬ يستلهم من بيونشيه إنه يكتب روايته المشهورة‫#‏خريف_البطريرك‬، وكمان الكاتبة المشهورة ‫#‏إيزابيل_الليندي‬ تكتب عنه روايتها‫#‏بيت_الأرواح‬ والجدير بالذكر إن إيزابيل الليندي تبقى بنت أخو الرئيس المنقلب عليه سلفادور الليندي.
في 2002 سافر بيونشيه لبريطانيا عشان يتعالج من مرض ما وفي الوقت ده كان صدر قرار من قاضي اسباني بالتحفظ عليه ووضعه تحت الإقامة الجبرية تمهيدا لمحاكمته عن جرائمه ضد حقوق الإنسان.
وفعلا تم التحفظ عليه ووضعه تحت الإقامة الجبرية لفترة لكنه أطلق سراحه ورجع تشيلي بعد ما تم الاستناد لتقرير طبي بيقول إنه عنده "خرف" وغير مسئول بشكل مينفعش معاه إنه يقف عشان يتحاكم قدام القضاء.
في 10 ديسمبر 2006 مات بيونشيه وهو عنده 91 سنة، وأفلت من العقاب أو المثول أمام القضاء الدولي أو التشيلي، ولم يستطع الشعب التشيلي أو العالم أن يحاسبه عن جرائمه السياسية أو الجنائية لحسابات ومصالح سياسية وسخه

تقاسيم

(1)

في الشتاء القادم :

سأعتزل مواقع التواصل 

وأرسم نفسي بين فراشتين

وأحمل جثة الصيف على يدي

وأطوي غصة القلب مع صفحة الأمس

وأشتري مطراً تفوح منه رائحة حبيبتي

(2)

كأن البحر يعرفني 

فأسأل عن تراث منه يسعفني

 فيحدف موجه نجم 

ويحدفني

 بسر لست أحفظه 

فيحفظني

لوقت الحزن ألعنه 

ووقت الفرح يشبهني

(3)

تقول الجمرة الملتهبة لقطرة ماء ساقطة:

أطفئي ناري برفق،

واحتوى لهبي،

فإني قد أكلت النفس من حُبي.
ترد قطرة المياه في ولع:

تعالي وادخلي رَحِمِي،

فإني قد ورثت الحب،عن سُحُبٍي.

(4)

قضيت نصف عمري أبيع الحب،

كنت أصحو وفي قلبي الخجلْ،

وأحمل داخلي الأملْ،

وأكتب على الماء ..

أخر كل شهر ..

قصيدة على عَجلْ،

والآن قد وفيت بالتزامي،

وبعت ما تبقى في سلال الخبز،

وأشتريت بما كسبت،

خاتما وضعته في إصبعي،

وأياما من عسلْ

(5)

أهدرت قصيدتين كي أصعد السلم 

وتناسيت قصتين كتبتهما لأجل النوم بسلام 

ورميت أغنية من نافذة الباص لأكتم حزني 

ولملمت ورقي الأبيض في خزانة روحي 

كي لا أبوح بنجواي

كسرت فنجان قهوتي التي لم أشربها لأنها لم تكن معي 

ورحلت بخيالي إلى منفى قريب 

ونصبت خيمة هناك لأجمع قوت عمر مضى 

وعلقت خيبتي على شماعة ذكرياتي 

ودفنت موتي لأنجو من مطاردة الوساوس 

وعدت كطفل لا يستطيع الحبو 

ولا يعرف من الكلام غير الغمغمات

لفة الزمن

الزمن ملعوب في أصله
والمكان ضاعت مفاصله
واللي رايح سن نصله
واللي جاي يوم الحساب
***
هي ثورة نور وحق
يوم تشد ويوم تدق
وفي خيالنا حلم شق
فجر حاضر مش غياب
***

الصورة مقتبسة من هذا الرابط

والتاريخ بيلف دايما
مرة أيسر مرة أيمن
لما نسكت يبقى حتما
يوم هنوصل للسحاب
***
الزمن ملعوب في أصله
والزمان ضاعت مفاصله
واللي رايح سن نصله
واللي جاي يوم الحساب

أظن يا حبيبتي

كم ألف ألف ألفُ عامْ،
قبل أن تنالَ من عيونكم،
ستارةُ الختامْ؟
أظن أننا في مشاهدٍ عظامْ،
والرسلُ قد ضاقت بهم نفوسُهم،
والأرضُ قد تحجرت دموعَها،
ولم يعد "سلامْ"
وظلّ في فقدانِه غريباً،
وحلّ في حيّنا مكانَه،

بواعثُ انهزامْ.

 

الصورة مقتبسة من هذا الرابط

أظنُ يا حبيبتي،
أنْ نُبطلَ الغرامْ،
ونعلنُ الغوايةَ شهيدةً جديدةً،
وندفنُ حياتَنا المريرةَ،
في الرملٍ كالنعامْ
أظنُ أننا كبرْنا،
وقاطعتْ سبيلَنا الرهينةَ،
سحائبُ انقسامْ.
فشلتُ أنْ ألاحقَ الزحامْ،
وأكتبُ الشعرَ بلا كلامْ،
أظنُ يا حبيبتي،
لا وقتَ للملامْ.

أعرف اسمك

الصورة مقتبسة من هذا الرابط

 

أعرف اسمك .. قل
لست بالبعيد من المقل؛
قد تعبت من وصل جفا؛
واختفى ..
وانتهى إلى ثقل.
****
صار في النوم طريقي
رحت أمضي في عجل
سحره شط بقلبي
لمدارات زحل
****
همت وحدي في صعيد
وانتشيت في دجل
رمت شوقا للسما
وانفردت في وجل
****
أعرف اسمك .. قل
انت لي كل الأمل

في الزمن القديم

في القدم كانت الحياة ساخرة

والبهلوان يصادق السلطان

لا هم في حقائب السفر

ولا نسيان

لصوت ضحكتي العجوز

كانت الأحلام آمنة

والأفلام آمنة

والعين مستقر هدبها

والروح سالمة

في القديم من زماننا الرقيم

تركت كل الأسئلة 

ولم يكن بحوزتي عدم

وكل ما يحيطني سديم

الصورة مقتبسة من هذا الرابط

رحلة الشتاء والصيف

في شتاء الخريف

تدخل النساء مساكنهن

تكتفين بالموز والبرتقال 

تسمع حوائط الأسمنت أحاجيهن

عن انتظار الربيع الذي لم يأت 

وتبكي خجلا من ذكرياتهن

تغسل النسوة معاطفهن النظيفة

من أثر الرجال 

لكنه يبقى هناك 

داخل إحدى المعاطف

وجه بلا أي رسم

وجه مسيح

***

الصورة مقتبسة من هذا الرابط

***

في صيف الربيع
تنشر النساء أحاجيهن
على حبال التواصل
تغردن معا
في رثاء الموز والبرتقال
يرددن معا أغنية للشرود
فلا حيرة بلا ظل نزوة
ولا فرحة بلا طعم نشوة
ويبقى الجليد الذي في الشوارب
طعاما لخمر الكؤوس الدفيء
وتبقى النفوس التي في المجالس
تحاكي تماثيل بابل
وأشعار عشتار
وليلى التي أهدرت دم قيس

ميزان مختل

قلّمتُ أظافرها الخشنة،
واحدة تلو الأخرى.
ثم أشارتْ بأصابعِ يدها،
نحو التلْ.
قالت: اصعدْ.
قلت: إن صَعِدتْ أحلامُك أيضاً، 
سأجاهدُ كي أجدَ الحلْ.
قالت: لسنا إلا مشتاقَين ومعشوقَين،
ولا يكفي لعبور البحرِ،
أن ترسمَ صورتنا بالزَبَد على شطِ الرملْ.
قلت: لا تنزعجي من حيرتنا،
لا تَزِنِي مستقبلَ فرحتنا.
بميزانِ مختلْ.

الصورة مقتبسة من هذا الرابط

“صوت الحق وصويت الباطل”

تدوينة عن أحداث قضية مجلس الوزراء:

قضية أحداث مجلس الوزراء  12/ 2011 اللي خدت مننا راقات وراقات من أول يوم حصلت فيه الأحداث ولحد دلوقتي مرمطة وبهدلة قدام نيابة وقضاة تحقيق ومحكمة جنايات عادية لحد ما وصلنا بعد تنحي قاضيها إلى محكمة جنايات متخصصة في قضايا الإرهاب.

المشكلة الحقيقة اللي بتواجهنا في القضية دلوقتي مش إننا واقفين متهمين زي كل القضايا اللي فاتت، المشكلة في تدليس وغش أجهزة الدولة وسيطرتها المبالغ فيها على كل الملفات ومفيش حد مش متهم في التدليس والغش وإخفاء المعلومات الحاصل ده من كل المؤسسات الخاضعة بشكل أو بأخر للنظام القديم اللي جزء منه هو "وزارة الدفاع" وده جزء مسيطر ومتحكم في الكل ومنفصلش عنه وظل بيعمل كل ما في وسعه وبيقود وبيتحكم وبيناور عشان يحافظ على نظام مبارك بعد قيام الثورة في 25 يناير 2011.

بصرف النظر عن جدلية أساسية من جدليات ما بعد الثورة اللي هي " الجيش حمى الثورة" ولا لأ، واللي خدت نقاش ومعارك بين شباب الثورة وكل الشعب المصري بطوائفه وفئاته وإخوانه وأحزابه وسلطاته وبابا غنوجه.

مجلس عسكري متهم:

نيجي للمشكلة اللي في قضية مجلس الوزراء، إن الخصومة الحقيقية في القضية دي بين المجلس العسكري كمؤسسة أدارت شئون الحكم فيما بعد تنحي مبارك المخلوع، واتخذ أفرادها قرارات كانت تقدر تقول بطيئة في مواضيع خاصة بالإنتخابات الرئاسية والتشريعية أو في محاكمات رموز النظام القديم اللي بينتموا هم شخصيا إليه، أو متسرعة وظالمة في محاكمات عسكرية وتشويه لفرق الثورة وتدخل مفرط في القوة والعنف مع مظاهرات "العيش والحرية والكرامة الإنسانية".

نيابة ولا قضاة تحقيق:

وعشان كده طلبنا من أول ما بدأت الأحداث في 16/12/2011 ندب قاضي تحقيق، عشان كنا بنأمل إن انتداب قاضي وإبعاد يد النيابة العامة اللي كان يرأسها "عبد المجيد محمود" المعزول لاحقا، بقرار من "مرسي" المعزول برضه بعد موجة إحتجاجات 30 يونيو 2013.

وساعتها انتدبت الجمعية العمومية لمحكمة الاستئناف "3 قضاة" مش قاضي واحد، واتنقلنا من الوقوف أمام النيابة العامة إلى القضاة الثلاثة دول، ولكن للأسف اللي كنا نأمله من وجود حياد وسرعة فصل في الاتهامات والتحقيق النزيه العادل والعدالة الناجزة وتنفيذ الإجراءات القانونية السليمة اللي هتنصف المظاليم سواء اللي اتقتلوا ولا التسحلوا ولا اللي اتعروا ولا اللي اتصابوا ولا اللي اتسجنوا ولا اللي اتعذبوا، متحققش منه أي حاجه، وبقى كل مساوئ النيابة العامة قدامنا هي هي رغم انتداب قضاة تحقيق، وزاد على ده فشل وظيفي متعلق بانعدام خبرة حقيقة مطلوبة في إدارة التحقيقات الخاصة بالنوع ده من القضايا، اللي بيكون فيه تهم متعددة، وكمان بيكون الدولة وكبار موظفيها متهمين فيها زيهم زي افراد الشعب العاديين والمواطنين الغلابة المظلومين.

والفشل في الإجراءات الإدارية المطلوبة لإدارة تحقيق مختلف كاشف للحق ومنتزع للقوة وللحق بشكل يليق بتحقيق العدالة وإنصاف المظلوم، جرجرنا لسكة اللي يروح ميرجعش، ودخلنا في دوامة التفاصيل وإنعدام السلطة الحقيقية في محاكمة العسكر أمام القضاء العادي، وابتدأ "القضاة" اللي تم انتدابهم للتحقيق يستعينوا بالنيابة العامة لإجراء أجزاء كبيرة من التحقيقات، لإن قضاة التحقيق معندهمش عدد الموظفين أو المساعدين اللي يخليهم يجروا كل التحقيق، وكان لازم لهم عشان يخلصوا كل التحقيقات إنهم يستعينوا بالنيابة العامة، فبقى عندنا نيابة عامة بأعضاءها وموظفيها بتحقق وهي مكرهة على ده لإنهم شايفين إن دي مسئولية "قضاة التحقيق" بناء على قرار الجمعية العمومية لمحكمة الاستئناف،  وقضاة تحقيق بيخلصوا التحقيق وعندهم رؤية سياسية مخالفة لرؤية المتهمين وبان من تصرفاتهم وتعليقاتهم في التحقيقات قد ايه هما ضد اللي بيحصل من تظاهر واعتراض على قرارات السلطة. ده غير إن بعض من القضاة دول كان بيحتل مراكز ادارية في مؤسسات الدولة زي "مجلس الشعب" قبل الموجة الأولى من ثورة 25 يناير 2011.

محكمة جنايات عادية في أكادمية الشرطة:

وصدر أمر الإحالة من قضاة التحقيق في 7 مايو 2012 بعد سنة وخمسة شهور من التحقيق في القضية من قضاة التحقيق، والمفاجأة اللي مكنتش مفاجأة الصراحة، إن تم إحالة 269 متهم من المتظاهرين اللي كانوا في شوارع ميدان التحرير بيطالبوا بالعيش والحرية والكرامة الإنسانية، ولم يصدر اي قرارات إحالة أخرى متعلقة بقتل أو إصابة أو تعذيب أو إحتجاز المتظاهرين دول.

ولم يصدر من قضاة التحقيق أي إدانة لأي من أفراد الدولة أو رؤساء مؤسساتها أو اتهام عن الجرائئم اللي ارتكبوها ضد المتظاهرين وضد الشعب المصري في الأحداث الخاصة بمجلس الوزراء، على الرغم من البلاغات اللي تملى دواليب محاكم ضد الدولة وموظفيها، سواء كانت ضد المجلس العسكري أو الأمن المركزي أو القوات المسلحة أو وزير الصحة ومديرين المستشفيات الحكومية أو قضاة التحقيق نفسهم اللي قدمنا فيهم بلاغات وشكاوى للنائب العام والتفتيش القضائي.

ووقفنا قدام محكمة جنايات عادية الدائرة 17 جنايات جنوب القاهرة، وتم التحفظ على المتهمين "المتظاهرين سابقا" في نفس القفص اللي وقف فيه مبارك وولاده وحبيب العادلي.

التهم:

وجه قضاة التحقيق للمتهمين عدد كبير من التهم، من بينها:

 مقاومة السلطات والحريق العمدي لمبان ومنشآت حكومية وإتلافها، واقتحامها، والتخريب، وإتلاف الممتلكات العامة والخاصة، وتعطيل المرافق العامة، وحيازة أسلحة بيضاء، وقنابل مولوتوف وكرات لهب، فضلا عن حيازة البعض منهم مخدرات بقصد التعاطي وممارسة مهنة الطب دون ترخيص، والشروع في اقتحام مبنى وزارة الداخلية لإحراقه، وإتلاف وإحراق بعض سيارات وزارة الصحة، وسيارات تابعة لهيئة الطرق والكباري، وبعض السيارات الخاصة بالمواطنين التي تصادف تواجدها في شارع الفلكي.

الدائرة 17 جنايات جنوب القاهرة:

وفضلت القضية تتأجل قدام الدائرة 17 جنايات جنوب القاهرة كالتالي:

1)    الأحد 29-07-2012 أول جلسة

القرار: استمرار حبس 5 متهمين في أحداث مجلس الوزراء، وإخلاء سبيل 11 متهمًا.

2)    السبت 20/10/2012 ثاني جلسة

القرار: تأجيل الدعوى لاستدعاء الشهود، مع إخلاء سبيل جميع المتهمين.

3)    الخميس 29-11-2012 ثالث جلسة

القرار: تأجيل لحين البت في التظلمات المقدمة من المتهمين في قانون العفو الشامل.

4)    الخميس 31-01-2013 رابع جلسة

القرار: تأجيل لسماع شهود الإثبات والاطلاع على المستندات مع تكليف النيابة العامة بضم تقرير تقصي الحقائق حول أحداث مجلس الوزراء، وضم تحقيقات النيابة العسكرية.

5)    الثلاثاء 30-04-2013 خامس جلسة

القرار : تأجيل للقرار السابق.

6)    الخميس 28-11-2013  سادس جلسة

ملحوظة: منع المحامون من حضور الجلسة، بسبب رفضهم ترك متعلقاتهم الشخصية (هواتف وأي أجهزة إلكتورنية أخرى) لأمن المحكمة.

القرار: قرر المستشار عبد المنعم عبد الستار، الخميس، التنحي عن نظر محاكمة 269 متهمًا في أحداث مجلس الوزراء، وذلك لاستشعار الحرج.

محكمة جنايات إرهاب في معهد أمناء الشرطة:

ومن 28 نوفمبر 2013 لحد أخر فبراير 2014 حوالي شهرين كاملين بعد تنحي القاضي محضرناش جلسات محاكمة، واتحدد بعد كده جلسة يوم 4/3/2014 للمحاكمة قدام الدائرة 5 جنايات الجيزة "إرهاب"، وهي من الدوائر اللي خصصت لمحاكمة قضايا الإرهاب.

ولحد دلوقتي منعرفش ليه الدائرة 17 جنايات جنوب القاهرة تنحت عن نظر الدعوى وإيه الحرج اللي اتعرضتله عشان تتنحى، وبرضه منعرفش إيه السبب إننا نقف للمحاكمة قدام دائرة إرهاب خصصت بعد موجة 30 يوليو لمحاكمة أحداث الإرهاب اللي هي التفجيرات والحاجات الوحشة دي اللي معملهاش المتظاهرين في أحداث مجلس الوزراء، وكان كل مواجهاتهم مع قوات الأمن واشتبكاتهم بأسلحة عبارة عن طوب وحجارة وشوية قزايز مولتوف.

أما عن محكمة الإرهاب اللي وقفنا قدامها دي وبتحاكمنا دلوقتي في "معهد أمناء الشرطة"، وبصرف النظر عن إنعقاد المحاكمات سواء اللي قبل أو دلوقتي في أماكن مخصصة للشرطة بنتعرض فيها لتفتيش وتقليب وتهديد مستمر وعدم إحساس بالراحة والأمان أو إننا في مكان غير مخصص لإقامة العدل وتغليب الحق على الباطل، بل هو مخصص لتأهيل وتدريب أفراد الشرطة على كيفية ممارسة القهر والقمع ضد الشعب، وكيفية استخدام السلطة والنفوذ من أجل مصالح وأحلام شخصية، وإنه أكتر مكان قامت ضده ثورة العيش والحرية والكرامة الإنسانية.

إحنا واقفين قدام قاض يدير جلسات المحاكمة بنظام إدارة فصول مدرسة ابتدائي، وكل كلمة أو حركة من أي شخص من المتهمين أو المحامين محسوبة على ميزان ساعة رملية، وعلى الرغم من إنعندنا خبرة كمحامين في التعامل مع هذا النوع من القضاة المتشددين في قواعد الربط والضبط إلا إنه غير مريح بالمرة في توصيل رسالة العدالة قد ما هو بيوصل فكرة الحزم والإرهاب.

والإرهاب اللي أقصده هنا مستمد من ناحيتين: الأولى إننا بنتحاكم في مقر تابع لوزراة الداخلية، وإن إدارة الجلسة إدارة شبيهة كتيبة عسكرية، لدرجة إني متخيل إننا هنطلع من المحاكمة دي بعد نهايتها معلقين على كتافنا شرايط ورتب عسكرية أو إن ممكن حد من المحامين يتحبس بسبب إخلاله بنظام الجلسة لمدة 24 ساعة مثلا أو أكتر. فلو ده إحساسنا كمحامين يبقى إيه الإحساس الواصل للمتهمين "المتظاهرين سابقا".

محكمة لا تعترف بالثورة:

من الملاحظ على سلوكيات السيد المستشار القاضي رئيس الدائرة 5 جنايات إرهاب، واللي بانت من أول جلسة في 4/3/2014 وتاني جلسة 20/3/2014 إنه لا يعترف بالثورة ولا بيسمح بذكر اسمها أو التلفظ بيها خلال الجلسة، وده اتضح من خلال طلب أحد الزملاء منه في خلال كلامه عرض أحد المتهمين على الطب الشلرعي لإنه مصاب ثورة، فالقاضي رد عليه وقاله: بس بلاش كلمة مصاب ثورة وبتاع.

وكمان لما طلبنا ضم "تقرير تقصي الحقائق" في الجزء الخاص بأحداث مجلس الوزراء، رد وقال: "إنا ميلزمنيش تقارير، ومفيش حاجه تلزمني إني أضمه، ومش هاخد باللي مكتوب فيه" ..

ولما وضحناله إن اللجنة دي كانت مكلفة بجمع معلومات وأدلة عن قتل وإصابة المتظاهرين ودي حاجه معترف بيها في كل الأنظمة اللي بتقوم فيها ثورات، قال: "دي لجنة مش قضائية، وهما بالنسبالي شوية ناس قعدوا مع بعض".

وبعد مقاوحة مننا كهيئة دفاع سمح لنا بإننا ممكن نروح نطلب صورة رسمية من التقرير بناء على تصريح من المحكمة في محضر الجلسة، لكن رفض تكليف النيابة العامة بضمه، وبالتالي إحنا قدام يا نعرف نجيب صورة من التقرير أو لأ، وده يعتمد على حسب إرادة الجهة الإدارية اللي بحوزتها التقرير، وكمان يوضح لنا إن المحكمة ميهمهاش المجهود اللي اتبذل من لجنة أغلبها أعضاء نيابة وقضاة ومستشارين في الدولة لحد دلوقتي ولا هتلتفت ليه لو قدمناه أو استدللنا بالمعلومات اللي مكتوبة فيه.

الجلسة الجاية 1 إبريل:

إحنا هنقف الجلسة الجاية قدام محكمة الإرهاب، وبشكل شخصي عندي أزمة من الوقوف في المكان المسمى بمعهد أمناء الشرطة، وفي المحكمة اللي اسمها محكمة إرهاب، ويا عالم هنوصل لفين وهتودينا الأيام فين.
-------------

وصلات مرتبطة :

1) إخلاء سبيل 61 متهما في أحداث مجلس الوزراء

2) في مثل هذه الأيام

3) ما حدث مع قضاة التحقيق

اغتراب بلا عنوان

واحتجبتٌ،

عندما ظهرتُ للعيانْ -

رأيت نفسي كاملَ النقصانْ -

فابتعدتُ،

لم أعدْ إنسانْ

#أحمد_حشمت

ضحكتين ووردتين

ضحكتين هُما .. في قلب امرأة،
ولعبة أطفال،
وعلبة مناديل معطرة،
وأكياس دم ،
وقبلات لأحمر الشفاه تركت على زجاج الشرفات الشفاف،
ورجل أعطى ظهره المنحني لها كعامل نظافة مسن.

وردتين هُما .. في عقل امرأة،
وحبات سكر بلون الفل وبطعم الفانيليا،
ورياح صمت مشحونة بالصبابة،
وأفكار سنجاب لم يجد قوت يومه،
وفنجان قهوة لا رائحة له،
وأبراج حظ،
وقطعة من قماش فستان قديم،
وخاتم لرجل كان قد أعطى ظهره المنحني لها كعامل نظافة مسن.
‫#‏أحمد_حشمت‬

الصورة مقتبسة من هذا الرابط 

تعذيب أم تهذيب (مشاهد خيالية واقعية)

مشهد (1):
ليل يوم الجمعة 7 فبراير 2014:
في حجرة جدرانها مطلية باللون الأسود، نورها خافت جدا يصدر من مصباح صغير مثبت بأعلى الجدار الذي به باب الحجرة، ولا يكاد يضيئ 5 سم حوله، يقف رجل قوي البنية بشارب كثيف ويعمل ضابطا في جهة أمنية، أمام باب الحجرة الموصد من الداخل، وفي منتصف الحجرة كرسي بدون مسند يجلس عليه شاب في الثلاثينيات من عمره نحيل الجسم، يرتدي ملابسه الداخلية فقط "فانلة حملات + بوكسر"، ويقطر من وجهه وملابسه قطرات عرق مختلطة بالماء الذي صب على جسده كمحاولة لإفاقته:

الصورة منقوله من هذا الرابط

الضابط بصوت هادئ: قوم أقف يااااااااااااد على رجليك.
الشاب: .........
الضابط "بصوت أعلى وبحزم أكثر": قوم أقف يا روح أمك يا نايتي.
الشاب يغمغم بكلمات غير مفهومة.
الضابط بصوت "يرج جدران الحجرة": اقف يا ابن الجزمة.
الشاب تميل رأسه على كتفه الأيمن، ويخرج من فمه رغاوي بيضاء كرغاوي الصابون، ولا يسمع منه أي صوت.
الضابط يتقدم تجاه مكان الشاب، ويرفع يده لأعلى في استعداد لصفعه على وجهه، وقبل أن ينزل يده لأسفل يقع الشاب من على كرسيه مائلا تجاه الضابط ويسقط منكبا على وجهه، لتستقر رأسه على قدمي بيادة الضابط.
الضابط يرفس رأس الشاب من على قدميه، ويخرج من باب الحجرة، صافقا إياه بشدة.
***
***
مشهد (2):
صباح السبت 8 فبراير 2014:
الضابط في مكتبه مع زميل له في نفس الجهة الأمنية، ويعمل بوظيفة مسئول حقوق الإنسان بها:

الصورة منقوله من هذا الرابط

الضابط (أ) : أنا مشفتوش يا باشا، أنا بس دخلته أحقق معاه بنفسي هنا في المكتب، طب ساكت ع المكتب بعد ما شرب اللمون.
الضابط (ب): طيب وأثار التعذيب اللي موجوده في جسمه؟

الضابط (أ): بقولك مشفتوش وملحقتش أتكلم معاه.

الضابط (ب): أيوه يعني ممكن يكون حصل قبل كده، قبل ما تقعد معاه يعني.

الضابط (أ): طيب ايه رأيك، وحياة ولادك .. أول ما جابوا العيال دي وفي العرض أنا قلتلهم محدش يمس الواد ده شكله ابن ناس، وأنا محرج عليهم أصلا يلمسوا أي حد .. الكلام ده قبل الثورة يا باشا .. إحنا اتعلمنا خلاص ومبقيناش نعمل أي حاجه مخالفة للقانون.

الضابط (ب): يعني انت شايف إن اللي في جسمه مخالف للقانون؟

الضابط (أ): يا باشا متوقعنيش في غلط .. مفيش حاجه في جسمه .. هو جاله هبوط في الدورة الدموية يمكن من الخضة أو عشان مكلش، معرفش بقى السبب إيه؟

الضابط (ب): أيوه بس ده في جسمه كدمات وسحجات، وحاجات تانية شكلها حصلت بألات حادة.

الضابط (أ): بص يا باشا إحنا ممكن ندي الواحد قلمين على بونيتين، ولو لزم الأمر شلوت خفيف، بس التعذيب الفظيع ده لأ .. منعملوش .. إحنا خبرة برضه مش لسه ولاد اليومين دول.

الضابط (ب): ايوه بس الواد اتعذب.

الضابط (أ): طيب ما هو ممكن يكون ده حصل قبل ما نستلمه .. أيه المشكله ؟ حد عارف هو كان فين؟

الضابط (ب): ايوه بس انت في محضرك مكتبتش إن حالته كانت بالشكل اللي أنا شفته ده؟

الضابط (أ): محضر ايه يا باشا .. المحضر يتقطع ويتعمل اللي انت عايزه .. كله يتصحح زي ما تقول.

الضابط (ب): تمام.
***
***
مشهد (3):
ليل الأحد 9 فبراير 2014:
حلقة من برنامج تليفزيوني من برامج التوك شو، يستضيف فيها المذيع اللامع أحد لواءات وزارة الداخلية:

الصورة منقوله من هذا الرابط

المذيع: إيه رأي حضرتك.
اللواء: بصراحة وفي الحقيقة وفي الواقع، إن بلدنا بعد الثورة اتغيرت وبقى فيها إشاعات كتير، ومستهدفة من ناس كتير، وأول جهة مستهدفة هي وزارة الداخلية، لأنها مصدر الأمن والأمان للناس، وهم عايزين يهدوا المصدر ده عشان يقدروا يخربوا في البلد.
المذيع: بس دي مش إشاعات.
اللواء: لأ طبعا إشاعات .. والدليل على كده إن محدش شاف حاجه، وكله بيتكلم ع الفيس وتويتر بدون أي سند أو إثبات.
المذيع: والناس تثبت إزاي وإنتوا اللي في إيديكم الجثة والمحضر وكل حاجه.
اللواء: لأ ده مش صحيح .. إحنا أكتر ناس متراقبين وعلينا تفتيش وكل الناس بصالنا في شغلنا، وكل اللي بنعمله ميعجبش، وكل أساليبنا غرضها التهذيب أولا واخيرا.
المذيع: التهذيب ولا حضرتك التعذيب؟
اللواء: حضرتك لو فيه تعذيب كانت النيابة أثبتت ده، لكن النيابة ما أثبتتش حاجه من ده، ولا وجهتلنا اتهام.
***
***
مشهد (4):
صباح الاثنين 10 فبراير 2014:
يقف مجموعة من المحامين الحقوقيين وأخرين من المهتمين بالقضية، أعمارهم ما بين 25 و 35 سنة،  في مكتب رئيس النيابة الشاب، يفوضون أحد المحامين للتحدث نيابة عنهم:

الصورة منقوله من هذا الرابط

المحامي: حضرتك أنا ساعات بتخيل نفسي رئيس نيابة، وبقول إنه لو كنت كده كنت المفروض هاخد إجراءات وأتدخل بأشكال متعددة لصالح العدالة والقانون والمجتمع، يعني أنا لو رئيس نيابة يبقى عندي حق أعمل تفتيش مفاجئ على الأقسام والسجون اللي في دايرتي وأشوف المتهمين المحتجزين، وأراجع المحاضر الموجودة ودفتر الأحوال بشكل عشوائي، على فترات مش بعيدة، عشان أحاول أقلل من اللي بيحصل فيها من تعذيب.
رئيس النيابة: ساعات كل واحد فينا بيتخيل إنه يقدر يعمل حاجات كتير، ولما يقعد في المنصب أو المكان اللي بيتخيل فيه نفسه مش بيعمل أي حاجه.
يعني بنفس المنطق لو أنا تخيلت إني محامي، فأنا بشوف طلبات غريبة من المحامين وعندي اعتراض عليها، وبقول إني لو مكانهم مش هطلبها ولأ اعمل زيهم.
المحامي: أيوه بس المحامي معلهوش رقابة غير ضميره .. وموكله يقدر يحاسبه لو قصر في شغله .. لكن النيابة أحاسبها إزاي؟ وأراقبها إزاي؟ في وظايفها ودورها اللي مش بتعملها؟
رئيس النيابة: يا أستاذ انت فاكر إن فعلا نقدر نعمل ده .. مش كل حاجه مكتوبة ع الورق نقدر ننفذها .. انا فعليا معنديش سلطة على الشرطة، ولا أقدر أروح القسم من غير ما أبلغهم، ولو بلغتهم انت عارف ايه اللي هيحصل، هروح ومش هوصل لحاجه .. ده لو زي ما انت بتقول فيه حاجه أصلا.
***
***
مشهد (5):
ليل الاثنين 10 فبراير 2014:
تجمهر لأهالي الشاب ضحية التعذيب في محيط حرم مشرحة زينهم.
والد الشاب يجلس جنب جثة أبنه في صمت وعلى وجهه أثار الفجيعة، ووالدته تصرخ وتنتحب بكل ما فيها من عزم على ضياع شباب إبنها، وبعض نشطاء الفيس بوك وتويتر الذين ينقلون الأحداث ويواسون أهل الضحية.
يقف ناشط ليلتقط بعض الصور لجثة الشاب وهي محمولة على الأكتاف في محاولة لعرضها على الطبيب الشرعي وتشريحها قبل الدفن.

الصورة منقولة من هذا الرابط

والد الشاب: حسبي الله ونعم الوكيل .. حسبي الله ونعم الوكيل.
والدة الشاب: إنتوا بتصوره إيه وتكتبوا إيه؟ ما راح خلاص .. كنتوا فين إنتوا؟ انتوا اللي قتلتوه .. إنتوا اللي عذبتوه.
ناشط (ب): إحنا بنحاول نساعدكوا .. ومش هنسيب حقه.
والدة الشاب: حقه ضاع زي ما هو ضاع في شربة مايه.
ناشط (ج): مش هنسكت يا أمي .. مش هنسكت .. يا هنجيب حقه يا نموت زيه.
والدة الشاب: كنتوا جبتوله شغلانه .. كنتوا بعدتوه عن الشارع اللي جاب أجله.
ناشط (د): يا امه ده قدره ونصيبه .. كان هيشوفه هيشوفه.
والدة الشاب تستأنف ردها في حشرجة وعويل: وليه يكون ده قدره ونصيبه، ليه ميكونش قدرك انت ونصيبك، ليه هو ميكونش معاه موبايل زي بتاعك ويقعد يكتب عن الناس اللي بتموت وبتتسجن، ليه يكون هو اللي يتسجن ويموت ناقص عمر، ليييييييييييه؟ ليييييييه؟
----------------------
ملحوظة: أي تشابه بين الواقع وأي مشهد سردي ورد في هذه التدوينة هو من محض الصدفة، وكل التواريخ المبينة والأماكن حتى وإن تشابهت مع الواقع فهي ليست حقيقة في حد ذاتها، لكن قد تتشابه مع تفاصيل حدثت وتحدث في الحياة اليومية العادية

مصر مهد الروتين

الصورة مقتبسه من هذا الرابط

مصر يامه يا سفينه .. الروتين ملا المدينة

موظفينك في المكاتب .. بطنهم بقت سمينة

المدير رايق وعايق .. ماله دعوة بشغل ناسك

والغفير حارس ونايم .. يوم ما يصحى ياكل ولادك

والوزير بفلوسنا يبني .. شاليهاته في مارينا

والخازوق دا أمن قومي .. يخزوقوه بإيدين أمينه

والتحدي إنك تعدي .. ألف سور وسور يودي

للحقيقة المرة يا بني .. إننا رحنا وجينا

رحنا لما خيالنا فكر .. وجينا في بوكس بسارينه

ومصر يامه يا سفينه .. قالبه وشك ليه حزينه?

كسرة في ولادك شبابهم .. ومطلعه بظلمك عينينا