النصيحة الأولى : خلي عندك طموح مهما وقعت وعترت لازم تقوم ومتخافش من بكره طول ما بتعمل اللي عليك ومتخافش من حد أيا كان واملأ قلبك ثقة بالله ولما تتعب أو تغلب ناديه وناجيه واشكيله .
النصيحة الثانية : حاول تحب كل الناس ، أيوه كل الناس واعداءك قبل أصحابك مش قضية هي بس حبك لأعداءك هيخليك تتصرف معاهم بشكل أكثر حنكة وذكاء لكن كرهك ليهم هيخليك تتعامل معاهم بعصبية وهيخلي جواك مشاعر سلبية هتأثر على كل اللي حواليك، ولو معرفتش تحبهم اطلب من ربنا يبعدهم عنك ويجنبك شرهم
النصيحة الثالثة : احسن الظن بالناس ومتقعدش مع نفسك تفكر وتقول فلان كان قصده وحش أو فلان كان نيته مش ولا بد ، متصدرش أحكام على الناس وتفكر في عقاب ليهم غير لما تتأكد ـ وخلي بالك من تتأكد دي . لأن رمي الناس بالباطل مش سهل عند ربنا وعند الناس وافتكر دايما إن بعض الظن إثم .
النصيحة الرابعة : قرب من نفسك وحبها، إسألها وجاوبها، كافئها بس متدلعهاش على طول، وعاتبها لو غلطت يوم، علمها وربيها على الاجتهاد والجد وتحمل المسئولية والمثابرة .
النصيحة الخامسة : القدر والقسمة والنصيب مش مخلوقين في حياتنا عشان نتكل عليهم ونقول ربنا مقدر كده وهو عايز كده، القدر هو نتيجة فعل ايدينا والقسمة إختيارنا والنصيب هو المكان والزمان اللي بنحط نفسنا فيه
النصيحة السادسة: روح بروحك مطرح ما تروح .. سافر واحلم ولف الدنيا بخيالك متملش ومتتعبش .. بس خليك ثابت بقلبك في حتة بتحبها عشان تقدر تقاوم أي مطبات تقابلك .
النصيحة السابعة : متحطش نفسك في دايرة مقفولة وتقعد تلف فيها لما يتقطع نفسك وتموت أحلامك جواها ، الأهداف بتيجي طول ما انت ماشي في خط مستقيم وفـ ضهرك نجاح عملته قبل كده بيزقك وبيحميك ، حطها حلقة في ودنك ـ اللف والدوران ميأكلش عيش وميطلعش العلالي .
النصيحة الثامنة : خلي أمالك وأمانيك في الفريزر ومتطلعش غير اللي تحتاجه منها، مترميش كل أحلامك ع الارض مرة واحدة ، لأن ساعتها مش هتلاقي حد يلمها معاك
النصيحة التاسعة : خليك في حالك بس متمشيش جوه الحيط، وخلي عندك مخالب وأنياب بس في الحق، وبرضه في الأول والأخر المسامح كريم .
النصيحة العاشرة : ساعة الحب متتعوضش، وعشان كده إمسك فيها بإيديك وسنانك، لإنها لو راحت - يا عالم - يا ترجع يا مترجعش، وحوط على حبيبك يضلل عليك، ولاغيه عشان تلاقيه .. ومتكتمش كلمة حب حلوة في قلبك طول ما حبيبك يستاهلها .
النصيحة الحادية عشرة : إحفظ الله يحفظك، إحفظ الله تجده تجاهك، إذا سألت فاسأله ، وإذا استعنت فاستعن به، واعلم أنه لو اجتمعت الأمم على أن يضروك أو على أن ينفعوك ما فعلوا إلا بقدر ما قدره الله لك .
النصيحة الثانية عشرة : حس بالناس اللي بتحس بيك، واللي بتسأل عليك إسأل عليهم، كلمهم لو بعدوا، خليك قريب لكل اللي بيحبوك، طبطب عاللي زعلان منك، وإعتذر للي غلطت في حقه، لأن المحبة أصلا معناها القرب .
النصيحة الثالثة عشرة : لما تشوف حاجه تشد نظرك وتعجبك وتحس فيها جمال الصنعة وإخلاص وإتقان اللي عملها ومجهوده في إنها تطلع بالصورة اللي عجبتك دي .. روح لصاحبها لو تعرفه أو دور عليه لو متعرفوش ، واشكره وإدعيله لأنه أكيد هيبقى محتاج يسمع منك كلمات إعجابك .
النصيحة الرابعة عشرة : خليك عارف وواثق إن كل ضيق أو هم يقابلك وليه حل، وكل مشكلة ولها حلال .. بس إنت فكر فيها وإعقلها أو شوف حد قريب يفكر معاك، متسيبش نفسك للوهم والإحباط والوش الحزين، متنساش إن عمرك قصير فمتضيعوش في وهم العجز وقلة الحيلة .
النصيحة الخامسة عشر : فيه ناس في دنيتنا كل شغلها الشاغل إنها ترتبلك مصايب وتنصبلك فخاخ ومكايد، بقولك إيه : متحطش في دماغك ربك كبير .
ورمضــــــان كـــــــريم
