الأربعاء، 29 يونيو، 2011

ليه اللي حصل حصل؟!

في الأول اتفرج ع الفيديو ده : (فيديو مسيرة تشييع جنازة محمود خالد شهيد السيارة الدبلوماسية)

httpv://www.youtube.com/watch?v=vNJD07Ioe60

وبعدين اتفرج ع الفيديو ده : (عسكري يستفز المتظاهرين ب «رقصة» )
httpV://www.youtube.com/watch?v=EMrMDNOFgQ0

تعالى نشوف بقى اللي حصل إمبارح سببه إيه ؟!

أولا : أمين شرطة "قاتل أسطوري" اتحكم عليه مرتين غيابي ويطلع بصوته في التليفزيون وكمان محدش ينفذ عليه الحكم لحد دلوقتي .

ثانيا : إخلاء سبيل كل الظباط اللي موجه ليهم اتهامات صريحة بقتل المتظاهرين أيام الثورة وممارسة عملهم الطبيعي اللي هو طبعا "قتل الناس وتعذيبهم" مش تأمينهم .

ثالثا : فريد الديب اللي طالع في الفضائيات يجمل صورة المخلوع مبارك زي ما بتعمل الماشطة في الوش العكر .

رابعا : استمرار حبس متظاهرين ومحاكمتهم عسكريا بالمخالفة لحقوق الإنسان وللحريات وللعدالة والإنصاف .




خامسا : التأخر في إصدار القرارات الثورية الهامة ومطالب الثوار زي حل المجالس المحلية الفاسدة وإقالة المحافظين والوزراء الفاسدين .

سادسا : الإعلام الخائن الذي يهيج الدنيا بكذبه المكرر وبضلوعه في نشر الإشاعات وتحفيز ، وحط تحت الإعلام الفاجر الواطي مليون خط أحمر .

سابعا : التعدي اللي بيحصل كل يوم على مواطن مصري في مختلف المحافظات .. زي الراجل اللي ظابط المنوفية خلاه يبوس رجل العسكري بتاعه .. ولا زي السواق اللي اتقتل عند قسم الازبكية وطلع المأمور يقول الأهالي اقتصت منه في لهجة غبية .



يعني إيه شوية ناس ضربوا الأمن المركزي بالطوب عند وزارة الداخلية يقوم الأمن المركزي يستفز وياخد عاطل في باطل ويضرب في الناس اللي تقابله من عند وزارة الداخلية لحد ميدان التحرير ، وإيه كمان ؟ كان فاكر الناس هتسكتله زي زمان؟

إحنا في عصر ما بعد الثورة يا جهلة النظام يا متخلفين .. يعني الناس مش طايقاكم أكتر من الأول وكمان عارفة تعبر عن الضيق اللي جواها ده .

لو لسه الأمن ووزارة الداخلية فاهمة إن الناس هتتسك على قفاها وتسكت يبقى لازم يروحوا بيوتهم لأن ده يبقى غباء وتخلف لا إرادي يعد سبب قوي لنقص الأهلية أو فقدها يمنع صاحبه من تولي الوظائف العامة فما بالك إن المتخلف ده يبقى مأمور قسم شرطة أو قائد قوة شرطية أو مدير أمن أو وزير داخلية .

وبعدين هو الناس زهقت من البهدلة اللي شافتها .. كل يوم والتاني بيتحاكموا في النيابات العسكرية والمحاكم العسكرية عاملة أوكازيون السنة دي وأحكام بالعبيط .. كتر خير القضاء العسكري والله ، طيب ما يورينا شطارته في قتلة المتظاهرين والسفاحين .

وفريد الديب ده اللي طالع يلمع نجم الموسم وصاحب الحفلة والمولد الأخ المرشال مبارك .. هو مش عارف إنه فاسد ولا إيه ؟ وإنه كان مش مغرر بيه من فسدة زيه وسايب الكلاب تاكل مال اليتامى والمواطنين الغلابة وما ذلك قال علينا خلوهم يتسلوا.


طيب هو الديب نفسه كان واخد أكتر من أربعة مليون جنيه من مؤسسة أخبار اليوم عشان بيع أرض مملوكة ليها بالمخالفة للقانون ، لأ وصرفهم بموجب طلب قدمه لرئيس مجلس الإدارة ومش على إنهم أتعاب لأ ده كان كاتب في الطلب إنهم مصروفات أنا مش عارف مصاريف إيه دي كلها اللي تتصرف في بيع حتة أرض ؟ ولما النيابة واجهته وطلبت منه يجيب فواتير أو إيصالات صرفه ""4795358 جم .. قال إنه دي أتعاب بس كتب في الطلب إنها مصاريف عشان مكنوش هيوافقوا إنهم يصرفوا ليه الأتعاب دي كلها وإنه استخدم حقه في البند الثاني من العقد اللي موقعه مع مؤسسة أخبار اليوم بإنه يجوز ليه طلب أي مصاريف أو أموال ينفقها والمطالبة بها .

مع إنه برضه بيقول إنه كان المفروض إنه له نسبة من عقد البيع تجاوز 12000000 جم "اثنا عشر مليون جنيه" .. طب بذمتكم حد يكون أتعابه بالـ 12 مليون والعقد بينص على نسبة ويروح يقدم طلب عشان ياخد 4795358 جم ، بس وكاتب إنها مصاريف !!

الأعجب من كده إنه رد الفلوس بشيك لحساب النيابة العامة .. والنيابة قبلته ومنزلتوش متهم في القضية رقم 201 لسنة 2011 جنايات أموال عامة .

إيه يا حكومة ؟!

فينك يا رئيس الوزرا ؟!

إيه يا سيادة النائب العام ........ "المخترم"

أما بالنسبة للمجلس العسكري ... أنا مش طالب منك حاجه ؟! كفاية عليك اللي عملته الصراحة .. إنت مجلس سكر وعسل وحلو وجميل وسلطان زمانك . يا سكر إنت يا مدلعنا ومهشتكنا ومغرقنا في النعيم .. يا اللي كنت وبقيت .. ها ... ( كنت ..... وبقيت ..... وكأنك يا أبو زيد ما غزيت ).

والسلام ختام

إرسال تعليق