يعني ايه معنى الحرية .. لما يكون الأحرار اللي سبب فيها جوه سجون العسكر .
يعني ايه خير وحب وأمل .. لما يكون أصحاب الأيادي البيضاء والقلوب الطاهرة النقية مقفول عليهم باب زنزانة .
يعني ايه الكلام الجميل والأحضان الدافئة .. لما يكون أهل المحبة والصدق والإخلاص بعيد عن نظرنا وفي ايديهم كلابشات حديد .
وازاي نفهم معنى الصبر .. ومفيش ناس يصبرونا ويطبطبوا علينا .
وإزاي نداوي جروحنا .. وأخواتنا اللي بيحنوا علينا تحت سقف وفي عنبر ضلمه جوه سجن كبير في طره .
وإزاي نحلم .. والحلم خطفوه من قدام النيابة العسكرية وهو واقف بيتضامن مع اللي بيتحاكموا عسكريا .
علي غنيم .. إنسان
والإنسان اللي بتكلم عليه هنا مش لحم ودم وعقل بس .. الإنسان يعني حاجات كتير مش فينا كلنا .
الإنسان يعني حضن يحسسك بالأمان والثقة بالنفس والأمل .
الإنسان يعني كلمة صادقة طيبة تخفف عليك أوجاعك .
الإنسان يعني روح حلوة كلها براءة وطفولة .
الإنسان يعني دموع تنزل على شهداء ثورة بقالها سنة ونص ولسه محققتش أهدافها .
الإنسان يعني اللي مش بيهتم بنفسه أكتر من إهتمامه بالناس .
الإنسان يعني قلب واسع يضم الكل ويحب الكل .
الإنسان يعني اللي بيستحمل أكتر من طاقته وبيشيل هم غيره .
الإنسان باختصار هو علي غنيم .
الحرية لعلي غنيم ولكل رفقاء الطريق اللي بيتحاكموا وبيتسجنوا عشان في بلدنا اتأخر قطار الثورة ووقف في محطة غير محطة الوصول .
الحرية لعلي غنيم ولينا كلنا في بلد ملاها ظلم العسكر .
الحرية لعلي غنيم صاحبي اللي يشرفني إني أكون صاحبه .
ليست هناك تعليقات:
إرسال تعليق