#عن_الشارع _الشعبي
الشارع مليان تفاصيل لا يستهان بيها
كراكيب متركبه بعشوائية خلاقه
طبعا أنا بتكلم عن الشارع الشعبي اللي الناس بتهرب منه وتروح الرحاب أو الشيخ زايد أو العين السخنه
وطبعا بتكلم هنا عن الشارع الشعبي مش شوارع العشوائيات اللي معتقدش إننا ممكن نلاقي فيها شوارع أصلا
مواصفات الشارع الشعبي اللي اقصده كالأتي:
عرضه ميقلش عن 8 متر تقريبا
طوله من أوله لأخره حوالي 50 متر تقريبا
جواه مدرسة ابتدائي/إعدادي طالع منها موسيقى طابور الصباح ودوشة الإذاعة المدرسية وصوت عيل صغير بيحي العلم بعلو حسه وكله شموخ "تحيا جمهورية مصر العربية"
جنب المدرسة بالظبط محل مكوجي معلي صوت الراديو وطالع منه أغنية "مصر هي أمي"
في نفس اللحظة بيعدي عربية بيجرها حمار وراجل راكب عليها لابس جلابية فلاحي وماسك اللجام وبينادي بصوت حياني: "بيكيا بيكييييييا"
ودوشة صوت طاسه الزيت ع النار في محل فول وطعميه وناس بيتزاحموا عشان ياخدوا طعميه سخنه في سندوتشات العيش البلدي
وبنات ثانوي بلبسهم الأبيض في كحلي حاضنين شنط كتبهم ع صدرهم بيدفوا بيها إحساسهم إنهم متأخرين ولازم يمدوا شوية وإلا هيتذنبوا
قهوة في نص الشارع مشغله إذاعة القراءن الكريم ع النايل سات وصوت المنشد طالع بيصدح:" محمد بشر . . في نوره قمر.. في طهره ملك . . يمشي على قدمين"
ورشة السمكري اللي جنب القهوة وفيها صاحبها مطلع دماغه من تحت عربية دايو زرقا وبيقول للقهوجي:" واحد شاي على بوسطه سكر عالي وحياة ابووووك"
ميني ماركت حاطط على ناصيته كراتين الشيبسي والشيتوس وتلاجات البيبسي والكولا بلونها الأحمر والأزرق
صوت طشه الطعمية في طاسه الزيت بيعلى مع صوت راديو المكوجي اللي في نفس اللحظة بيغني: "يا أغلى اسم في الوجود. . يا اسم مخلوق للخلود . . مصر مصر تحيا مصر"
وعيلين بينطوا سور المدرسة وواحد فيهم بيقول للتاني: " يلا يا عم نلحق الماتش . . النهاردة هنلعب مع فرقة الواد زيزو دول مراهننا على 5 جنيه إنهم هيغلبونا"
وهوووووب يركبوا أول توكتك معدي وينطوا جواه زي الفيران . . على صوت تسجيل التوكتك اللي بيغني أغنية:" أنا شارب سوجاارة بني ودماغى عمالة بتاكلني"
وست من الدور السادس في نفس اللحظة بترمي كيس زبالة صغير اسود فيقع في نص الشارع في نفس المكان اللي كان واقف فيه التوكتك
بتاع الألوميتال فارش مطبخ لسه مخلصه لزبون وعارضه قدام محله ولون المطبخ بيج في بني
السجاجيد المزخرفة والمنقوشة ألوان كتيرة اللي اتغسلت طلعها المكوجي وعلقها على المواسير اللي بيعلق عليها الحاجات دي عشان تنشف في الشمس
صوت السيسي في تليفزيون القهوة بيقول: " نحن نحارب الإرهاب ليس من أجل مصر وحدها . . ولكن من أجل الإنسانية"
ليست هناك تعليقات:
إرسال تعليق