الأخوة الاعزاء الكرام والقوى الإسلامية أصحاب الدعوة لمليوينة 29 يوليو حاسس إنهم عاملين زي أهل النجعاوي اللي طلعوا هايجيين عشان شنبه اللي اتحرق ، لكن لو كان النجعاوي نفسه اتقتل مكنوش طلعوا أصلا ولا اهتموا، أهو القوى الإسلامية طالعة مليونية عشان الإنتخابات أولا ونسيت دم الشهدا اللي سال .
الأخوة الاعزاء الكرام والقوى الإسلامية أصحاب الدعوة لمليوينة 29 يوليو : جاتكم نيلة مليتوا البلد .. وافتكروا قول رسول الله : "ولكنهم غثاء " ، لقد ورمنا من أشكالكم العكرة وعقولكم المضلمة .
دا انتوا محضرتوش ولا صليتوا على جنازة أي شهيد اتقتل في الثورة .
دا انتوا حتى مطلعتوش بيان تقروا فيه الفاتحة على أرواح الشهداء .
جايين مرة واحدة تعملوا مليونية وشعارها " إسلامية إسلامية " على إيه ؟
طب صلوا استخارة الأول حتى .. شوفوا ربنا هيقولكوا إيه .
بصراحة إنتوا بتثبتوا كل يوم انكم أسهل حاجه المجلس يقدر يلعب بيها .. والمخابرات وأمن الدولة جواكم .
فكروا شوية لو سمحتم .. أعقلوها عشان خاطر النبي .. ده شيء بالعقل .
أحب أقولكم إن الإسلام في مصر مش في خطر .. مصر معجونة إسلام .. مصر بتحب أل البيت ، بأفعالكم دي إنتوا بتهيجوا الناس ضد الإسلام بأفكاركم الحمقاء غير المدروسة دي وربنا يحمينا من شر نواياكم الطيبة ومن شر حماقاتكم .
يا أخوانا الناس اللي معتصمه ومرميه في الشوارع والميدان عشان دم الشهدا مش عشان يأجلوا الإنتخابات زي ما انتوا فاكرين .
الأخوة الاعزاء الكرام والقوى الإسلامية أصحاب الدعوة لمليوينة 29 يوليو : يا ريت متضيعوش تعب الليالي اللي فاتت دي هدر .. ويا ريت تقدروا وتوزنوا الأمور صح .
هناك تعليقان (2):
اتمنى انهم يفهموا كده يارب
فكرة التدوينة حلوة بس الصياغة عنيفة شويه يا احمد ...يعنى لما تحاول تعقل واحد تقوله نتكلم بالعقل ما تقولوش انه حمار
وبعدين حقولك على حاجة برضه .. لو نحينا دم الشهداء جانبا مع خالص التقدير له لانه اهم محركات الثورة لكن بفرض اننا نحيناه ... الغريبة ان الناس دى لا جابت سيرة محاكمات الحرامية والقتلة والتعذيب ولا حتى اى تعليق على الحكومة .... حاجة تقفع
إرسال تعليق