الاثنين، 1 أغسطس، 2011

تحية للمشير راعي الفلول في مصر

تحديث : وكمان صفحة مجلس الوزراء المصري بتكمل الكذبة وبتحاول تقنع الناس بإن اللي في التحرير بلطجية وخارجين عن القانون

---------------------------------------

في الوقت اللي الجزيرة مباشر مصر بتنقل فيه أحداث فض ميدان التحرير من قبل الأمن المركزي وقوات الجيش يوم 1 أغسطس 2011م الموافق 1 رمضان 1432هـ . كان فيه تعليق يعبر عن مدى فداحة الوضع الهزلي اللي إحنا فيه، وتوافقه مع التعدي على المعتصمين بالقوة وحصارهم في جامع عمر مكرم ودخول الجامع من قبل العساكر والضباط بالأحذية ده غير السب والشتم للمعتصمين اللي خايفين وهربانين من بطش العسكر الذي لا يرحم حتى في منتصف نهار أول يوم رمضان .. التعليق كان على شاشة الجزيرة مباشر مصر بيقول : كل عام وسيادة المشير طنطاوي بخير وسلام

طبعا كل عام وسيادته بخير وسلام ونعيم واستجمام وراحة ووئام .. ومليون طز في دم الشهداء وأهاليهم

كل عام وسيادته بخير وسلام .. وطز في العدالة الغايبة والناس اللي عملت الثورة تتحاكم عسكريا

كل عام وسيادته بخير وسلام .. والفلوس المسروقة محدش رجع منها قرش والهربان هربان ومحدش هيعرف يجيبه

كل عام وسيادته بخير وسلام .. وطز في شعب طافح الكوتة طول عمره ومشافش خير البلد دي أبدا

كل عام وسيادته بخير وسلام .. مع إن المصابين بيتهددوا وأهالي الشهداء مطاردين عشان يتنازلوا عن محاضرهم ويقبلوا الدية

فعلا كل عام وسيادته ومجلسه الهمام في جحيم وعذاب بحق رمضان كريم ربنا بيقبل فيه الدعوات وبيستجيب فيه دعوات المظلومين والمقهورين والمعذبين في أرضه .. وملناش غيرك يا رب نتحامى فيه

إرسال تعليق